წიგნაკი თქვენი გეგმებისთვის

წიგნაკი თქვენი გეგმებისთვის


და მაინც, რაში გვეხმარება ყოველდღიური ბლოკნოტი და რატომ შეუძლია ამ პატარა ნივთს შეცვალოს თქვენი ცხოვრება უკეთესობისკენ?

  1. ფურცელზე გადატანილი აზრი თითქოს ჩაცემენტდება ჩვენს მეხსიერებაში, საიდანაც ვერაფერი ამოშლის. დღეს, როცა ინფორმაციული ნაკადი ყველა მხრიდან უწყვეტად მოედინება, თითქოს ყველაფერს ვიმახსოვრებთ, მაგრამ რამდენად ვახერხებთ მნიშვნელოვანი ინფორმაციის დამახსოვრებას, მთავარზე კონცენტრირებას? ამ მხრივ, ფურცელი და კალამი შეუცვლელია. მე, პირადად, ხშირად დამვიწყებია კომპიუტერის კლავიატურაზე აკრეფილი ტექსტი, მაგრამ ხელით დაწერილი ძალიან იშვიათად. წერის პროცესი თითქოს გვათავისუფლებს მენტალური ბარიერებისგან, შემოქმედებით აზროვნებასა და საკუთარი თავის, გარესამყაროს უკეთ შეცნობაში გვეხმარება;

  2. დღის გეგმის პუნქტებად ჩამოწერის რეგულარული პრაქტიკა და ამ პროცედურისთვის, რომლისთვისაც გნებავთ საღამოს საათები გამოყავით მეორე დღის დასაგეგმად, გნებავთ დილის, სანამ საქმეებს შეუდგებით, დროის ეფექტურად განაწილებასა და პროფესიული თუ პირადი ცხოვრების პრიორიტეტების სწორად განსაზღვრაში დაგეხმარებათ – მოკლე, საშუალო და გრძელვადიან პერსპექტივაში. ცხადია, თუ მხოლოდ წერით არ შემოიფარგლებით და იმოქმედებთ კიდეც დასახული (დაწერილი) მიზნების ხორცშესასხმელად;

  3. გეგმა ან გადაწყვეტილება, რომელიც საკუთარი ხელით დაწერეთ, უფრო მეტ პასუხისმგებლობას შეგმატებთ და მუდმივად შეგახსენებთ თავს. შესაძლოა, სირცხვილის გრძნობაც კი დაგეუფლოთ, თუ თქვენსავე ხელით დაწერილი გეგმის შესრულებისთვის ჯერ ვერ მოიცალეთ, რასაც ვერ ვიტყვით გონებაში წარმოშობილი სხვადასხვა აზრისა და იდეის შესახებ, რომლებიც, შესაძლოა ისე გაგვეფანტოს, თითქოს არც კი მოგვსვლია თავში. გსურს გააკონტროლო საკუთარი თავი? გახსოვდეს – რასაც დაწერ, გააკონტროლებ კიდეც;

  4. ბლოკნოტი არა მხოლოდ მომავლის სწორად დაგეგმვაში გვეხმარება, არამედ საუკეთესო საშუალებაა წარსულის გასაანალიზებლად. რა სჯობს კვირის ან თვის ბოლოს შევსებული გვერდების ხელახლა გადათვალიერებას და განვლილი დღეების ფხიზელი თვალითა და გონებით კრიტიკულად შეფასებას, როცა შეგიძლია გამონახო დრო და საკუთარ თავს გასცე პასუხი კითხვებზე – რა შემეშალა? სად შემეშალა? როგორ გამოვასწორო? მე განსაკუთრებით წლის შეფასება მიყვარს, რასაც, ტრადიციულად, ახალი წლის პირველ დღეებში ვაკეთებ – წყნარად ვაანალიზებ განვლილ წელს და ახალი წლის დასაგეგმად გასული წლის მიღწევებისა და შეცდომების გათვალისწინებით ვემზადები. ერთი სული მაქვს ხოლმე, როდის ჩავწერ ახალ გეგმებს ახალ ბლოკნოტში, რადგან ზუსტად ვიცი, რომ თუ დავწერ, შევასრულებ კიდეც!

ამიტომაც გირჩევთ თქვენც – დაწერეთ ყველაფერი, რასაც გეგმავთ და ისიამოვნეთ შესრულებული პუნქტების გადახაზვით. ვისაც ეს სიამოვნება არ განგიცდიათ, ყველაფერი ჯერ კიდევ წინ გაქვთ…

მადლობა, მეგობარო!